政情:收料站:Greg蘇有心永嘉無夢

官場早前流傳商務及經濟發展局局長蘇錦樑(Greg蘇)忌才,所以將遴選委員會推薦嘅副局長人選彈回頭,Greg蘇早前為咗澄清謠傳,聯同佢嘅政治助理陳百里同場出現,趁機展現團隊精神。近日再有消息進一步為Greg蘇平反,直指佢一直都積極搵副手,最新聽聞嘅名字係廠商會副會長吳永嘉(Jimmy),之不過係「神女有心,襄王無夢」先未成事喎。

傳吳請局長食檸檬 拒任副手

消息透露,Greg蘇喺今年農曆新年後曾透過中間人搵Jimmy,初步探討佢有無興趣做副局長,估計主要係睇中Jimmy同傳媒關係良好,加上同業界一直有傾有講,對於求才若渴嘅Greg蘇嚟講,Jimmy可以幫佢手絕對係多贏方案。不過世事嘅嘢邊有咁如意,聽聞Jimmy最後禮貌地婉拒咗Greg蘇。我哋曾經打畀Jimmy求證此事,不過直至截稿前未獲回覆。

不過話分兩頭講,商經局工作範圍數極都數唔完,例如免費電視發牌、旅遊業監管等議題都係「燙手山芋」,少啲政治手腕都可能令事件演變成政治炸彈。新政府至今運作咗九個多月,按既定嘅程序同手續,即使突然有心水副局現身Greg蘇面前,初步估計最快都要今年七、八月先可以上任,正所謂「求人不如求己」,睇怕Greg蘇未來三個月仍要一個人繼續頂硬上。