料唔會嚴重妨礙執法
另一項有機會夠票通過嘅修訂，係由工程界盧偉國提出嘅「隔夜條款」。「限奶令」規定任何人喺廿四小時內兩度出境，就唔可以喺第二次出境時攜帶奶粉，做法有啲反智。盧偉國就提議將廿四小時內嘅限制，改為一日內不得出境兩次，但隔一晚即使唔夠廿四小時都可以，做法會比較合理。
盧偉國個修訂暫時喺地區直選同功能界別分組，分別獲得十五、六名議員支持，反對同棄權嘅同樣有十五、六票，有一定機會通過。據聞食衞局認為有關修訂唔會嚴重妨礙執法，真係過咗亦無傷大雅，可能會「隻眼開隻眼閉」放生，唔會落力拉票攔截。
事件再次證明「限奶令」推行太急，內容未經深思熟慮，食衞局惟有被迫跪低投降。