政情：渝港經貿合作簽約 李嘉誠黃奇帆會面
重慶市政府最近嚟香港進行招商嘅活動，尋日舉行咗一場「渝港經貿合作推介會暨簽約儀式」，儀式過後，長和系主席李嘉誠突然現身，同重慶市市長黃奇帆會面超過半小時。
尋日簽署嘅合作金額非常龐大，總共有三十五個項目喺現場簽約合作，金額高達一百二十九億美元，黃奇帆致詞時候話，非常着重港資到重慶投資，因為重慶每年有一百億美元外資，當中六成來自香港，證明渝港兩地有深厚經濟淵源，港資項目更遍布地產、金融、工商業投資。
入貴賓室傾談半粒鐘
簽約之後，李嘉誠就同黃奇帆入咗貴賓室傾偈，兩人非常好傾，密斟咗成半個鐘有多，兩人握手道別時，雙方睇嚟都好歡喜，唔知係咪有好大成果呢。黃奇帆嚟咗香港三日，前日見完恒基兆業集團副主席李家傑，尋日就見李嘉誠。