北韓話就話會發動戰爭，不過至今除咗口水花四濺之外未見大規模動員，起碼暫時未有人死於偉大領袖金正恩無堅不摧嘅核彈之下，所以目前而言殺人最多嘅仍然係另一種兇器：禽流感。
點解話禽流感係兇器而唔係病毒呢？原因係中國解放軍有一位大校提出聳人聽聞嘅陰謀論，佢話最近肆虐華東嘅H7N9禽流感其實係外國勢力攻擊中國嘅生化武器，情況就同○三年沙士一樣。雖然呢一種陰謀論比較天方夜譚，可信程度唔會高得過北韓嗰個肥仔領袖一味靠嚇，之但係鐵一般嘅事實就係，H7N9嘅殺傷力實在非同小可，死亡率高過十年前嘅沙士。
唔理陰謀論有幾咁荒誕不經，禽流感真係兵臨城下吖嘛，同內地一衣帶水嘅香港係咪應該及早防範呀？好衰唔衰，香港嘅公立醫院似乎冇吸取沙士瘟疫蔓延時造成二百九十九人死亡嘅血的教訓，把關工作甩甩漏漏，病毒隨時來去自如。
本報記者巡查過幾間醫院，發現院內存在四大漏洞，防線鬆懈嘅包括伊利沙伯醫院、瑪嘉烈醫院以及威爾斯親王醫院等等。你知啦，醫院往往係疫症爆發嘅集散地，否則當年唔會有醫護人員淪為沙士亡魂，存在四大漏洞好得人驚啫，唔該食衞局局長高永文以及醫管局主席胡定旭好好反省一下。
四大漏洞究竟係點嘅呢？第一，醫院病床之間距離唔夠三呎，飛沫隨時噴到鄰床病友身上。第二，病房中門大開，等同冇掩雞籠，病毒有機會跟出跟入。第三，走廊加設病床，難阻病毒傳播。第四，家屬防疫意識偏低，探病又唔戴口罩，離院又唔洗手，一個唔覺意就會將醫院裏面嘅病毒帶到社區，一傳十，十傳百，傳到一發不可收拾！
呢嗱嗱嗱，大家唔好以為功夫茶危言聳聽，更加唔好以為係杞人憂天。開講都有話啦，一朝被蛇咬，十年怕草繩，十年前港人同胞的而且確被一條叫做「嚴重急性呼吸系統綜合症」嘅蛇咬咗一大啖喎，唔怕就假。
差啲唔記得講，除咗H7N9禽流感大鬧華東之外，新沙士亦喺中東一帶搞得人心惶惶，殺傷力同樣唔可以低估。換言之，目前嘅狀況係「雙疫齊飛」，若然香港嘅公立醫院繼續疏於防範，死得人多並唔係自己嚇自己嘅過度憂慮。
醫院病床之間距離唔夠三呎，主要原因係平均使用率超過百分之一百，醫院擴建無期嘅情況之下，增加病床嘅後果就係病人淪為擠迫戶。喂，特區政府信誓旦旦話要打造醫療產業，家陣醫院逼爆都無法改善，產你條命咩，簡直一場歡喜一場空啦！