政情:收料站:泊完碼頭大輝又想「自由」

廠商會立法會代表林大輝年初加入沙田地區政團公民力量(公記)後,大家都以為佢泊到個好碼頭,但原來公記只係佢嘅中途站。大輝話,至今仍然願意同任何政黨合作,喺芸芸政黨之中,又以自由黨同佢理念最相近,而佢本人都好欣賞身為商界嘅田北俊可以瞓身地區工作。睇嚟大輝為咗幫直選鋪路,分分鐘同自由黨合作都未定。

「共同目標」鋪路直選

大輝坦言,自己只係公民力量普通會員,並唔算核心成員,亦唔代表佢會拒絕其他政黨邀請,只係目前冇人搵佢。佢個人認為,同自由黨算係最夾,各方面都好相近。嘩,就咁聽佢講,唔通佢同自由黨好事近?

有自由黨消息話,田少做埋今屆後,年紀都唔細,會否競逐連任都唔知,而該黨同大輝經過特首選舉後,大家都有「共同目標」,所以合作機會絕對唔細,但喺選舉前夕先至合作都未遲喎。

其實大輝有此打算,都係基於直選考慮,因為公記消息話,大輝同沙田區議員龐愛蘭現時都係具備直選能力嘅會員,公記入面班兄弟都未決定撐大輝定龐愛蘭出戰下屆直選,如果到時決定撐龐愛蘭,大輝分分鐘乜都冇,所以大輝主動出擊話想入其他政黨,都唔係冇道理嘅。

第一手消息請下載on.cc東方互動iPhone/iPad/Android/Windows Phone Apps