政情：政府冷待扶貧小組
立法會扶貧小組委員會去年十月成立後一共開過五次會，部分有參與嘅議員批評小組進度緩慢，又質疑小組議程同政務司司長林鄭月娥做主席嘅官辦扶貧委員會脫晒節，起唔到監察政府同幫助市民脫貧嘅作用，並將責任怪罪喺小組主席馮檢基（阿基）身上。
只派官仔出席會議
不過，阿基就同我哋呼冤，話扶貧小組未起到預期中嘅作用，主因係政府刻意冷待佢哋，例如至今只派過勞工及福利局局長張建宗出席過一次會議，但林鄭就一次都冇現過身，有時仲派埋啲首席助理秘書長、助理署長等低層前線執行官員出席，佢哋對啲涉及跨局嘅政策同措施，唔係唔知情就係冇牙力，冇可能解答到議員啲問題。
身兼官辦扶委會委員嘅阿基又話，扶委會將所有會議議程同文件都列為機密，令佢無法扮演聯繫扶委會同扶貧小組嘅角色，小組委員亦攞唔到政府向扶委會提交嘅詳盡資料同研究報告，佢因此先會要求立法會秘書處自行搜集同研究，供委員參考。對於有委員批評扶貧小組議程高大空，阿基強調所有議程都係由委員一齊傾出嚟，唔係佢做主席就可以自行決定，佢希望有關委員有意見就直接同佢講喎。