政情:鬧學生遲到 袁國勇收投訴

香港大學醫學院微生物學系主任袁國勇尋日與一班中學生探討「熱誠關愛」,佢話香港依家包容少咗,郁啲就走去投訴人,連佢教書鬧學生,都竟然被學生投訴。原來近年醫科生遲到情況多咗,唔少人遲到十五分鐘,仲有啲學生會遲多過半個鐘添,佢忍唔住就話吓班學生,點知無耐就收到醫學院通知,話收到學生投訴,問佢點解要鬧學生呢?認真荒謬。

嘆社會對醫護尊重遞減

袁國勇無奈話,依家投訴文化好普遍,好似醫院管理局都成日收到投訴,多數都要賠些少錢,費事使錢請律師打官司,又慨嘆以前冇咩人會投訴醫生護士,反而依家每十個病人就有一個投訴咁話。

佢認為,最主要係依家啲醫生護士變咗做服務提供者,「啲人覺得自己有納稅,政府應分提供服務,做唔足就投訴。」加上有啲醫生淨係顧搵錢或懶理職業操守,如果再多負面新聞出現,社會對醫護嘅尊重愈來愈少,令真心關愛病人嘅醫護更少喎!

第一手消息請下載on.cc東方互動iPhone/iPad/Android/Windows Phone Apps