中環出更:醫療人員又有工會成立

為醫療人員爭取權益嘅工會有好多,尋日就再多個「香港醫療人員總工會」成立,由本身為醫生嘅工聯會副會長潘佩璆擔任主席。叫得做工會,難免要透過談判爭取權益,所以醫管局主席胡定旭(肥胡)都唔敢怠慢,尋日同埋食物及衞生局局長高永文一齊去捧場。

肥胡一聽到「談判」兩個字,就落嘴頭話醫管局同工聯會係老友記,唔使談判,有乜傾掂佢就得喇;佢仲拖埋高永文落水,話要同工會攜手向局長爭取更多資源,認真醒目。不過,肥胡都唔及工聯會榮譽會長鄭耀棠咁醒,事關棠哥擦晒鞋話,細個時最安全就係跟住媽咪,依家最安全就係捉住啲醫護人員,皆因香港醫護人員技術精湛喎。

潘佩璆:透過談判爭權益

潘醫生致詞時話,雖然香港有唔少醫學會,但工會嘅性質唔同,希望可以喺呢個新平台上爭取應有權益。好似早前工會已經為支援職系嘅同工爭取到每周工作四十四小時包食飯時間,近二萬人受惠,所以工會以後盡可能透過談判,去解決同工所面對嘅困難。

第一手消息請下載on.cc東方互動iPhone/iPad/Android/Windows Phone Apps