Jeffrey憶述，當年紅酒入境要納稅，自己曾同朋友一齊購入紅酒，並儲放喺海外地方，主因係可以慳存放紅酒嘅地方同稅項。不過事隔一段時間後，當佢要求紅酒代理商將已購入嘅紅酒運到香港時，該代理人以諸多藉口推搪，事後佢哋先知有人疑出現財政困難，一早已把存放嘅紅酒賣出套現。
馬時亨逃過一劫
據聞當時都有好多政商界中人，包括有專業背景嘅醫生、律師，甚至係銀行家都係受害者，大部分人最後都血本無歸，損失七、八成本金，換言之即幾十萬元左右。如果啲酒擺到依家，就唔止呢個價錢喇。不過當時亦有人逃過一劫，前財經事務及庫務局局長馬時亨喺做局長之前，對以前購入嘅紅酒一係賣晒，一係就一早運晒返嚟香港，所以冇乜損失。