政情：老婆北上買樓 高永文唔知價

我哋問過高永文係咪睇好內地樓市，佢就好老實話，今次決定全由太太話事，自己尊重對方決定，所以都無過問間屋幾大，買咗幾多錢，詳情都係太太先知，自己只係跟足規矩向行會作申報。我哋睇番政府推出辣招時間，財政司司長曾俊華喺二月二十二日決定推出「雙倍印花稅（DSD）」，樓市即時步入冰封狀態，高永文喺二月廿七日就通知行會秘書處有新申報，話太太喺中山市買咗個住宅單位，似乎高太對市場非常敏感，見到風吹草動即時改變策略，好有投資眼光。

老婆買手袋買鞋就話唔知，買樓咁大件事高永文無理由唔知啩，動輒幾百萬喎。不過睇番啲物業擁有權，高永文一向畀老婆話事，例如名下五個物業中只得一個九龍城區連車位物業係佢個人擁有，另外一個港島東物業就係同太太共同持有，其餘三間物業都係太太擁有。雖然大部分物業係老婆揸手，但去年被揭發住宅僭建時，高永文無用老婆做擋箭牌，自己一人承擔晒，都算係男人典範。

另一位高官教育局局長吳克儉，雖然無買磚頭等升值，但佢自己就「升呢」。本來只係馬會「賽馬會員」嘅吳克儉，二月廿八日通知行會，話佢已晉升成「全費會員」。其實全費會員同賽馬會員嘅福利差唔多，除咗會費貴十幾萬外，最大分別係全費會員嘅配偶都可做馬會會員，仔女仲可以申請會員附屬卡，於馬會內享受簽帳待遇。

吳克儉愛入馬場鬆弛

其實馬會都算係吳克儉嘅「鬆弛場」。佢上任後就遇上國民教育風波，嗰排每次喺政府總部見佢都係苦瓜乾咁嘅樣，反而有一次喺馬場見到佢，佢神采飛揚，仲同記者展示自己買咗邊幾場馬，就算最後輸晒，佢個樣都好興奮。至於做教育嗰瓣應唔應該入馬場，咁就要等佢自行判斷喇。