政情:鴨仔團抵韓 克勤即去買牙膏

立法會南韓考察鴨仔團有人臨陣退縮、亦有人因為唔記得帶護照而趕到甩轆,不過都總算順利抵達目的地首爾。隨團鴨仔之一嘅民建聯陳克勤一落機就急不及待咁去購物,但佢買嘅第一樣嘢竟然係牙膏同牙刷。克勤就解釋話,因為酒店冇提供,所以佢先要去買喎。其實克勤身為環境事務委員會成員,理應以身作則支持環保,出行時自備牙膏、牙刷至啱。

鴨仔團前晚抵達南韓,唔少鴨仔都急不及待去食當地嘅特色美食石頭鍋飯,仲爭相喺社交網站發貼。之不過克勤同工聯會郭偉強除咗一齊食石頭鍋飯,仲要一齊去買牙膏、牙刷。因為佢哋唔知當地酒店會否提供,所以惟有趕去買。好彩當地有便利店,佢哋都唔使四圍撲。

晤環團變講民主

除咗食石頭鍋飯,同當地環保團體見面當然先係主打。尋日成班鴨仔議員同環保團體見面時就有人問,通過減廢法例會對市民造成不便,點解政客唔驚將來敗選?環團秘書長就話因為有民主,民間團體就可以集結力量爭取政治支持。點知在場嘅自由黨張宇人就講笑話,咁香港要先有民主,再搞環保喎。

第一手消息請下載on.cc東方互動iPhone/iPad/Android/Windows Phone Apps