碼頭貨櫃工人罷工浪潮持續，最終點收科難以預料。原來連發起罷工嘅職工盟中人，亦意料不及事件會升級至現時局面。話說當日工會帶領數十名碼頭工人同資方談判不成，本來只想喺門口示威，然後聚集更多工友支持反抗。點知一班「左翼廿一」成員突然發難衝入碼頭，其他激進工友又跟隨，職工盟眼見無得退後，焗住支持工友行動，事件迅速升溫，演變成今日局面。好似尋日咁，唔少立法會議員都去咗撐場。
熟悉工運嘅人都知道，罷工永遠係最後一招，唔到最後關頭都唔可以用，而且罷工前一定要累積足夠嘅人數同怨氣，否則得少數人罷工，根本難成氣候，有工會中人分析話，李卓人都知道罷工唔可以打長久戰，一定要快刀斬亂麻，奈何最先吹雞搞罷工嘅係班左翼學生，職工盟又打住撐工人旗號，唔敢向工人說不，惟有頂硬上。
所以有工會中人形容，職工盟現時正搵緊下台階，佢哋今日會搞遊行去政府總部，慢慢將抗爭場合由碼頭轉移至政府總部，屆時碼頭工人可以輪流抗爭，唔使再以罷工手段苦戰，職工盟又可以繼續大打撐工人旗號，達至雙贏局面。