中環出更：三藩市市長重遊老地方
三藩市首位華裔市長李孟賢前日旋風式訪港兩日，再轉飛北京進行上任後首次官式訪問，同行嘅仲有當地前任市長布朗（Willie Brown）。李孟賢祖籍台山、美國出世，但其實佢同香港嘅淵源甚深，早喺一九七四年已經以交流生身份，來港學習廣東話同中國文化，加深對三藩市華埠嘅了解及為之後踏足中國做準備，所以佢能夠講得一口流利嘅廣東話。雖然今次佢匆匆訪港，但亦對香港嘅八達通印象非常深刻。
李孟賢尋日以一身便服現身酒店貴賓房，係佢出任市長兩年後首度非官式訪港，佢大讚香港係令人讚嘆嘅世界級城市，好似港人出街必備嘅八達通就好值得三藩市借鏡，佢更希望任內有機會以市長身份向香港取經添！
除咗八達通，唔好以為美國出世嘅李孟賢「黃皮白心」，想法一定非常西化，原來佢相當肯定中藥對預防感冒同減壓嘅成效，每逢冬天佢都會食中藥調理好身體，認為咁先有力量繼續佢嘅忙碌。
把握時間食齋菜
李孟賢今次只係留港短短兩日，但就好識把握時間去鑽石山志蓮淨苑食齋菜，佢仲大讚好好味，但同行嘅布朗似乎鍾情炸雞髀等傳統美式食物，中式齋菜都係淺嘗即止。要數李孟賢嘅至愛，始終係叉燒包同雪糕，而佢當年喺香港讀書時，亦好鍾意約埋同樣來自美國學府嘅同學食水餃配啤酒，口味相當中西合璧。但佢就好遺憾當年就讀嘅學校，位於亞皆老街嘅校舍已經拆咗，連學校全名都唔記得咗喇。
李孟賢向卓妮透露，今次行程會拜訪中國文化部等多個部長級官員，祖籍台山嘅佢亦會趁機返家鄉祭祖，而廣州、中山亦係唔少三藩市華人嘅「根」，一行四十三人嘅代表團亦會途經兩地。
卓妮