政情:譚志源矇查查放假

北京對香港政改問題「發硬功」,京官及官媒接二連三就特首必須「愛國愛港」等問題放話,駐港解放軍更喺短短九日內兩度進行軍事演習;本地方面,平等機會委員會早前突然宣布檢討現行四條反歧視條例,而政改同反歧視法同屬政制及內地事務局嘅政策範疇,偏偏政制局局長譚志源(Raymond)就喺呢個時間飛咗去美國度假,唔通佢係明知將有大鑊嘢發生,而刻意離港避難?非也,原來呢兩次行動政制局都疑似毫不知情,Raymond離港度假只係「不知者不罪」。

港府早已表明唔會喺今年內展開政改公眾諮詢,令政界誤以為嚟緊幾個月會少啲政治爭拗,點知自北京召開人大政協兩會後,接連有多名京官赤膊上陣,就政改問題「發硬功」,先有全國政協主席俞正聲提出「愛國愛港論」,之後有全國人大法律委員會主委喬曉陽說明對抗中央者不能做特首,最近再有內地官媒《環球時報》社評不點名狠批「佔領中環」等同「經濟自殺」,令唔少人大感意外。

外界以為夾好晒

有人事後揣測,可能北京同港府早已就有關問題分工,由北京直接出手處理香港政改,港府則專心搞經濟民生。不過有政制局中人爆料,其實喬曉陽等京官接連出招前,並無同佢哋「打招呼」,佢哋同一般香港市民一樣,都係透過睇電視同上網先知道喬曉陽到底講咗乜,因此亦談不上有乜配合工夫可以做喎。

至於駐港解放軍進行軍演,政制局中人更坦言,佢哋連依家香港有幾多駐軍都唔知,何況係需要機密進行嘅軍演?不過就唔排除保安局同個別紀律部隊,有事先接獲駐軍部隊通知。

此外,即將卸任平機會主席嘅行政會議召集人林煥光,早前突然宣布平機會將全面檢討現行四條反歧視條例,並建議可合併及簡化為一條統一嘅反歧視大法,有人估計平機會出招前已同政制局夾好,透過平機會檢討紓緩外界要求政制局就性傾向歧視立法嘅壓力。但政制局人就話,原來呢次行動佢哋同樣被蒙在鼓裏。

記得喺政制局由全名「政制事務局」易名為「政制及內地事務局」之前,經常畀泛民戲稱佢哋做「政制無事局」,話佢哋只識白逗人工,實際上卻無事可做。喺北京「發硬功」,平機會又疑似「作反」嘅新形勢下,睇嚟呢個舊花名好快又會有人攞番出嚟用。

第一手消息請下載on.cc東方互動iPhone/iPad/Android/Windows Phone Apps