中環出更：投資有道靚太撐起半邊天
數以百計悉心打扮嘅城中靚太名媛，早前中聯辦舉辦國際婦女節慶祝酒會齊聚。香港青年聯會賢慧社主席羅詠詩（Anthea）同埋賢慧社姊妹張詩培（Joanne）孖住現身，Anthea最近忙住籌辦賢慧社愛家日活動，佢好開心話，青聯常務副主席霍啟剛嘅新婚太太郭晶晶，將出任今次活動大使，下月五日將帶低收入家庭嘅小朋友，免費暢遊海洋公園。
卓妮見Joanne成晚企唔定，好似搵緊人，原來佢手機中儲存咗一張自己嘅BB相，話要畀金朝陽集團主席傅金珠睇。事關Joanne見過傅金珠個外孫女，即係中華總商會會董張俊勇同太太陳慧苓嘅寶貝女兒，覺得小B女樣貌似足自己細個嗰時，連鍾意喊嘅脾性都似到十足十喎！
傅金珠一手創立嘅金朝陽，喺銅鑼灣核心地段擁有多棟物業，僅次於希慎、恒隆等老牌地產集團。卓妮問佢點解咁有眼光，三十幾年前就早着先機喺區內收樓重建，佢開玩笑話：「銅鑼灣風水好嘛！」最近政府頻頻出招壓抑樓價，傅金珠話，近排商舖買賣已經放緩，顯示需求慢咗，佢認為租金將趨於穩定。
孟麗紅冇考慮來港投地
打扮優雅嘅祈福集團副董事長孟麗紅，成晚同中山市海外婦女聯誼會常務理事孫程禮慶好好傾，呢位孫太來頭不小，佢老公孫必達係國父孫中山嘅曾姪孫。孟麗紅同老公一齊投資發展嘅祈福新邨廣為人知，地產王國已擴展到廣州、番禺等地。但孟麗紅就話，冇考慮嚟香港投地，事關唔夠本地嘅大型地產商爭喎！
卓妮