全國人大常委會法律委員會主任委員喬曉陽前日同立法會建制派議員會晤時話，「堅持與中央對抗」就唔可以做特首，據聞仲點名民主黨何俊仁（鐵頭仁）做搞對抗例子。鐵頭仁尋日就高調搵傳媒解釋，自稱以往係用最理性和平嘅方法爭取普選，並唔係同中央對抗。
不過，當講到二○一七年特首選舉時，佢又話如果到時唔可以有一場「有意義嘅競爭」，佢會參與佔領中環行動，不惜犧牲專業資格同退休金，仲唔介意喺獄中度過添！鐵頭仁一時用最理性和平嘅方法爭取普選，一時又話為爭取民主連坐監都冇所謂，認真矛盾。（周依露攝）
