政情:有相為證:「宗」臣護娥

社聯尋日針對完善社會保障制度嘅問題,搵咗扶貧委員會轄下嘅社會保障及退休保障專責小組主席林鄭月娥,同副主席張建宗嚟聽下市民嘅心聲。台下其中一個發言嘅木蝨男,就話自己住咗喺板間房三年幾,成日畀木蝨咬,用咗一個月時間捉咗一樽木蝨帶嚟送畀林鄭。坐喺台上嘅林鄭聽到已經面色一沉,小肥張喺呢個時候,就即刻「好Man」咁搶先接過木蝨。

林鄭以為可以鬆一口氣之時,點知台下有人大聲要求林鄭親自「接蝨」,搞到林鄭勉為其難拎咗樽木蝨一陣就即刻放低。接蝨事件仲未完結,話說活動完咗之後木蝨男想再一次向林鄭獻蝨,不過今次都畀小肥張成功護駕,拎實樽蝨喺手,林鄭亦都企硬,就算有人叫佢拎下,佢都唔再就範。小肥張走嗰時仲話,木蝨自己見過好多喇。

第一手消息請下載on.cc東方互動iPhone/iPad/Android/Windows Phone Apps