「成都公立醫院」驚現何兆煒相片
嗰個「成都公立醫院」網站首頁九成九抄足聖保祿醫院個網站，醫院大樓就係香港嘅聖保祿醫院，只係醫院個名唔同，用簡體字顯示，同埋有簡體字介紹一間叫做「成都軍區空軍機關醫院」嘅服務，再進入網站內了解佢哋嘅服務，有啲專科中心都入唔到，至於「聯絡我們」一項，就係「成都軍區空軍機關醫院」嘅地圖。
聽聞聖保祿醫院都唔肯定內地有冇呢間醫院存在，但最近有職員發現呢個「老翻」網站，仲有老闆個樣喺度，已經有所行動，聯絡內地有關部門反映事件，尋日又出聲明，強調佢哋同嗰個網站無任何合作關係，唔會姑息呢種侵犯版權嘅行為，要求個網站負責人刪除所有同佢哋有關嘅資訊。