政情：同而不和 泛民真離「普」
千呼萬喚始出來，醞釀咗幾個月嘅真普選聯盟尋日正式成立，首階段成員包括二十七位泛民立法會議員。雖然真普聯係威係勢破天荒邀請到所有泛民主派議員參加，包括一直同民主黨不咬弦嘅人民力量，但睇番雙方尋日喺記者會上態度，就知道大家仲係面和心不和，搞到連公民黨梁家傑要幫手勸交，話泛民只有合作條件，再無分裂嘅本錢，希望聯盟可以做到和而不同。
人民力量之前提出三大加入聯盟條件，包括要求聯盟成員綑綁投票，以及要求二○一六立法會全面直選等。民主黨主席劉慧卿隨即批評任何加入聯盟嘅組織都唔應該提出前設，矛頭直接指同民主黨有唔少恩怨嘅人力。新民主同盟之後喺社交網站上為人力護航，卿姐更加即時出聲明譴責新同盟歪曲民主黨嘅言論，擺明同激進勢力誓不兩立。
喺尋日真普聯嘅記者會上，全程面黑黑嘅卿姐不但同人力兩位代表全程天各一方毫無交流，貴為黨主席嘅佢亦唔肯開口代民主黨解釋加入聯盟立場，而係交畀副主席蔡耀昌（狗哥）發言。而記者會仲未開完，卿姐就以趕時間開會為由急急腳走人。
被問到民主黨可唔可以同激進派合作時，狗哥就話要視乎大家係咪真心想討論，如果有人針對該黨進行惡意攻擊，或者動輒謾罵其他政黨，民主黨絕對唔會容忍。咁早就起晒弶，好明顯就係寸緊事事針對民主黨嘅人力。人力主席劉嘉鴻就好大方咁話，雖然人力過往同泛民有少少爭拗，但都希望大家向前看，透過聯盟呢個平台爭取普選。
記者會橫額跌落嚟掛唔番
召集人鄭宇碩就話，聯盟首階段會推動市民參與討論普選方案，下月初會舉行首場研討會。佢仲希望聯盟可以喺本年底提出建議方案，到時除咗向政府提交建議外，亦都考慮以民意調查了解市民意向。
雖然在座幾乎所有成員都覺得尋日係一個好開始，但喺狗哥講緊嘢時，後面寫住「真普選聯盟成立宣言」嘅橫額突然間跌咗落嚟，泛民議員整極都唔可以將佢回復原狀，要改貼另一塊細啲嘅橫額，唔知咁又預示咗啲乜嘢呢？