中環出更：滑雪扭親腰蘇澤光步步為營
貿易發展局主席蘇澤光（Jack蘇）向來瓣數多多，兼任電影發展局主席嘅佢尋日出席發布會，公布撥款資助新進導演拍攝「處女作」。不過，卓妮發現Jack蘇上台時，罕有要求工作人員擔櫈畀佢坐低致詞，正當在場司儀以為Jack蘇想坐低同現場觀眾慢慢傾，佢就自爆早前滑雪扭親腰，唔方便企咁耐。
上月卓妮報道過熱愛滑雪嘅Jack蘇，趁農曆新年去咗北京郊區試玩新滑雪場，點知尋日見番Jack蘇，行路竟然拐吓拐吓，要勞煩工作人員攙扶至勉強行到幾步，相信佢係喺北京滑雪期間扭親喇。義務擔任主席嘅Jack蘇，負傷都要親身出席發布會，可謂仆心仆命呀。
王英偉撐浸大爭地
同場仲有電影發展局基金審核委員會召集人王英偉，雖然佢卸任咗浸會大學校董會主席，但仍然力撐浸大同政府隔空爭取九龍塘前李惠利院校地皮。佢透露，雙方自○九年起，就地皮去向一直有商有量，直至政府月前喺毫無先兆下，突然申請將地皮交畀城規會更改土地用途，浸大當然火滾啦。不過，浸大同政府各執一詞，真係唔知邊個啱邊個唔着喇。
卓妮