中環出更:霍麗萍「朝聖」滿載而歸

自去年有間台灣人氣書店落戶香港銅鑼灣後,旋即成為文藝潮人嘅聖地,前日下晝五點鐘放工時間,卓妮就咁啱遇到已故全國政協副主席霍英東嘅長女霍麗萍(Pat)去書店「朝聖」,好悠閒咁喺書堆之間穿梭漫步,最後成功揀啱多本心水書籍,滿載而歸。

學貫中西嘅阿Pat似乎對好多學科都有涉獵,除咗佢專長嘅攝影藝術之外,對其他類別嘅書籍都好有興趣,例如佢行經陳列社會人文學科嘅書架時,就被一本講述單身現象嘅英文著作吸引,於是拎起本書搵個座位,同其他顧客並肩而坐,然後架起眼鏡埋首細讀,睇嚟同一個「打書釘」嘅街坊冇乜分別。

當阿Pat睇書十分鐘左右,就轉移陣地走上賣旅遊書籍嘅樓層,搵到一本專門講述喺印度尋訪佛陀足迹嘅旅遊書,阿Pat馬上駐足翻閱兼且睇得津津有味。莫非佢打算去印度旅行,為佛陀當年所經之處影番幾張沙龍?

睇書涉獵多個範疇

阿Pat就話,目前未有計劃,只係剛巧有空閒睇書參考吓啫。佢又話,一有閒餘就鍾意逛書店,呢種習慣早於放洋留學期間已養成。喜歡閱讀嘅阿Pat話,香港能夠有地方開設咁大型嘅書店實在令人高興。

原來佢今次逛書店除咗購買旅遊書籍外,仲揀選幾本有關宗教哲學嘅著作,由佢所買嘅書籍嚟睇,佢應該係相當博學之人。

卓妮

第一手消息請下載on.cc東方互動iPhone/iPad/Android/Windows Phone Apps