中環出更：專資會婆羅洲保護雨林
香港專業及資深行政人員協會（專資會）每年都揼本搞考察團，前年去過戈壁沙漠，去年就去非洲睇野生動物。前會長胡曉明（Herman）尋日出席活動時透露，今年八月將會由會長謝偉銓帶隊，深入馬來西亞婆羅洲嘅熱帶雨林考察兼推動環保。Herman解釋，婆羅洲擁有地球上最重要嘅環保資源，大家呼吸嘅氧氣都係產自熱帶雨林，該會希望喚醒大家唔好過度伐木，應該保護自然生態。
新華旅遊新總行環保開幕
Herman話，該會年前已經積極提倡環保，佢亦將環保融入生活，遵守停車熄匙已兩年，更不時以單車代步添。身兼專資會成員嘅新華旅遊董事總經理楊章桂芝（Cindy）亦響應環保，話說佢旗下位於觀塘逾萬呎嘅新總行尋日開幕，雖然有好多老友到賀，但現場一個花籃都冇。原來Cindy一早呼籲大家將花籃折現現金，全數捐畀慈善機構。
Cindy透露，新總行係自置物業，年多前無心插柳購下，呎價由五千多元勁升至九千多元，同區仲有數層寫字樓及倉庫揸手收租，認真和味。佢仲話，嚟緊最想去巴西旅行，順道陪愛女睇足球賽喎。
卓妮