政情：碧樺依抗拒做「女神」
因為關注少數族裔權益，中巴混血兒嘅碧樺依（Raees）被網民捧上「社福界女神」寶座，前年特首選委高票當選成為社福界選委，再令Raees風頭一時無兩，更上一層樓做埋「選委女神」，不過原來Raees唔太鍾意人哋叫佢做女神，一聽到「女神」兩個字就扁晒嘴，叫大家最好唔好咁叫佢喎！
同情謝曼怡
究竟Raees點解咁唔鍾意做女神呢？正在港大社會工作及社會行政學系教書嘅Raees尋日就同一眾宅男解釋，見到靚女就叫「女神」，其實係一種性別標籤同定型，咁係唔啱o架！提起近日同樣「榮升」女神級嘅財經事務及庫務局常秘謝曼怡，Raees仲一副感同身受兼大皺眉頭咁款，對「曼怡BB」被擺上枱深表同情，仲感嘆一句：「咁話晒佢都係AO嚟o架嘛！」
唔知Raees做咗女神之後，有無多咗人望佢或者同佢影相呢？Raees就話影相就無乜，至於有無多咗人偷望就唔知，就喺呢個時候，Raees身後出現一位男義工，話想同佢影張相！不過既然女神講到出口，各位都係將愛意藏心底好喇！