政情：今日你上鏡：肥亨餅印
前商務及經濟發展局局長馬時亨（肥亨）行蹤一向高調，但佢嘅兩弟一妹就絕少曝光。我哋早幾日就喺中環ifc遇到肥亨，見佢同一名無論年齡及身高都相若嘅男士企喺度密密斟，肥亨仲傾到指手畫腳、笑容滿臉。卓妮上前問吓佢身邊位男士係邊個啦，原來係佢胞弟，佢仲笑住反問卓妮：「我哋唔似樣咩？」
其實睇落肥亨兩兄弟嘅五官同面形都好相似，但細佬嘅身形明顯大一個碼。兩兄弟企喺商場傾咗幾分鐘，之後就分道揚鑣。肥亨話，佢細佬係做船務嘅，但就唔方便透露名字喇。講番肥亨近況，佢話早前趁住節日長假期，去咗泰國玩幾日叉電，返港後又再忙過，忙到高爾夫球都打少咗喎！