政情：有相為證：控煙辦殺上長毛辦公室
做咗煙民多年嘅立法會議員梁國雄（長毛），早前被自己友影到疑似喺立法會辦公室吸煙，好彩最後立法會秘書處並冇追究，只係口頭勸喻。不過，尋日我哋就發現有兩位控煙辦人員，喺立法會十樓走嚟走去，最終去咗長毛間辦公室，但又唔係突擊巡查或提出檢控，原來只係向長毛派發禁煙宣傳單張。
因當時長毛唔喺辦公室，控煙辦人員只好放低宣傳單張就離開，原來長毛落咗街吸煙。但奇就奇在控煙辦勞師動眾去立法會，都只係向長毛一位議員派傳單，似乎係衝住長毛而來。我哋問控煙辦點解選擇性針對長毛，係咪收到投訴呢？有冇向其他議員派傳單？點解唔檢查埋其他議員呢？兩位控煙辦人員都一一拒絕回應。
