政情：愛港之聲強調冇金主
憑元旦日搞嘉年華撐政府而嶄露頭角嘅支持政府組織「愛港之聲」尋日終於宣布正式成立，但成立大典竟然選址大埔屋邨酒樓，一百二十名會員飯前飯後更分別參觀大埔海濱公園同屏山文物徑，當正參加新界一日遊，莫非愛港之聲都靠「蛇齋餅糉」籠絡市民？召集人高達斌強調位位實收一百二十五元，一毫子都冇贊助，同枱會員亦都展示團費入數紙，澄清絕對冇收着數，旨在聯誼。
向商界籌款搞網台
尋日嘅成立大典相當熱鬧，百幾人坐滿十圍枱，即使未有會址同全職職員，亦已選出多位內閣成員。高達斌表示，愛港之聲至今已有逾八百人加入，喺社交網站向佢哋「讚好」嘅亦逾千人，未來會考慮收取年費平衡收支，強調背後絕冇任何「金主」。
不過，愛港之聲嘅聲勢近日似乎被愛護香港力量發言人陳淨心嘅出位言論蓋過，高達斌強調兩者定位唔同，「我哋唔係走激進路線」，但認為大家方向一致，未來一定有合作空間。聲言唔會「三分鐘熱度」嘅高達斌仲透露有意成立網上電台「愛港之聲」，向年輕人宣揚愛港理念，現已積極向商界籌款，相信半年後就有好消息。