中環出更：議員 高官 名醫野外定向大激鬥
無國界醫生野外定向尋日朝早喺沙頭角舉行，吸引三千人參加，當中包括高官、名醫亦組隊拗手瓜。為爭勝，各師各法，立法會議員范國威化身「千里眼」、莫乃光變身「飛毛腿」，加埋人稱「鐵人」嘅無國界醫生救援人員歐耀佳，實力超班，結果三扒兩撥衝線，贏成條街！
至於挑戰佢哋嘅，除咗醫學會代表隊，仲有由食物及衞生局副局長陳肇始、政制及內地事務局局長政治助理陳岳鵬、民政事務局局長政治助理徐英偉組成嘅「政能量」隊等，九隊人一決高下，好刺激。
刨地圖搵Check Point
歐耀佳所屬嘅「活力救援」隊爭分奪秒，趁台上嘉賓致詞時，已急不及待「刨」地圖。比賽一起步，歐、莫及范三人就變身「電兔仔」，一支箭標去搵Check Point「打卡」，大會刻意將Check Point擺得好隱蔽，范國威都有本事一眼關七，莫非佢裝咗X光眼鏡？
另一邊廂，徐英偉同陳岳鵬表現神勇，原來兩人係「老手」，但兩位猛男不忘照顧陳肇始，上山落斜時，總會伸手拉對方一把。玩到攰攰地，見街邊檔賣緊新鮮「冰菠蘿」，三人齊齊整番條歎吓。激戰近兩粒鐘後，「活力救援」隊以首名衝線，范國威同莫乃光開心到振臂高呼：「掂呀！」至於「政能量」，雖然三甲不入，徐英偉話會再接再厲，遲啲帶埋囝囝及太太，嚟農莊輕鬆吓。
奪冠嘅歐耀佳就話，無國界醫生出外救災時，同事不時要孭住醫療器材攀山涉水，今次讓大眾體會前線醫護人員的辛勞，好有意義。
卓妮