政情：李鋈麟「食沙」聲沙？
北京空氣污染指數爆晒燈，「毒霧」不散，已成為國際新聞。早前以北京市政協身份上京開會嘅東華三院候任第五副主席李鋈麟都話，出入京城要戴口罩避沙塵，可惜佢最後都係唔小心冷親，搞到聲沙沙。
李鋈麟日前帶病出席一個晚宴時話，雖然未知今次聲沙同空氣污染有冇關，但坦言京城近日空氣的確麻麻，佢亦渴望北京空氣清新啲，所以曾多次提案，要求京官正視京城嚴重嘅空氣污染問題。不過，京城富人太多，有車一族比比皆是，個個爭住揸車出街排放廢氣，真係想清新都難，惟有寄望北京人盡快醒覺，諗計對症下藥。
查實神州問題，何止京城空氣污染問題吖，「奶粉荒」仍然係死結。李鋈麟笑言，無意發奶粉財，即使有朋友叫佢合作生產奶粉，但因擔心食物質素難控制，所以婉拒咗喇。不過，佢就睇好內地食品類及農產品類股票，在需求殷切下，蛇年仍然係投資首選喎。