中環出更：東華高層諗計搞活天秀墟
台北經濟文化辦事處日前舉行春茗酒會，本港政商界數百人齊去捧場，一日趕幾場嘅東華三院主席陳文綺慧（Viola）就孖住東華執行總監吳志榮（Stephen）現身。講起東華營辦嘅元朗天水圍天秀墟開張近一個月，人氣及成效唔係咁理想，Viola話，佢哋已經度緊橋急救，包括邀請營商專家開班教檔主點樣做生意，不排除由副主席及總理們親自出動添！
雖然Viola今個月底任期就屆滿，但佢好緊張天秀墟嘅經營，當晚密密同Stephen了解最新情況。佢同卓妮講，當年中環某大型商場開幕時都冇人租，所以佢有信心最終可以搞旺個墟市咁話。
開班教檔主做生意
Stephen就話，東華董事局有好多大老闆，大家度橋密謀多管齊下容易搞掂。佢哋初步打算搵成功商人開班過兩招，亦會請專家講吓市場理論，等班小檔主兼備做生意嘅理論同埋實務，提升市場觸覺，咁就唔怕售賣嘅貨品冇吸引力喇！
行政會議成員張震遠、民政事務局常任秘書長楊立門及港台經濟文化合作協進會主席李業廣（Charles）都有到場，此外仲有台北經濟文化辦事處處長朱曦夫婦、仁愛堂總理羅台秦等一眾台灣幫。
一向鍾意潛水嘅Charles話，因為最近天氣凍，所以少咗落水，打算下月復出到深水灣對出海域潛水。台灣觀光協會香港辦事處主任王春寶話，台灣綠島及墾丁都係潛水勝地，海底遍布美麗珊瑚，下次要推介畀Charles至得。
卓妮