「膠箱牆」霸道零檢控

發泡膠箱層層疊阻礙行人,食署竟錄得零檢控!北角春秧街街市每日人流如鯽,惟街坊王先生卻稱,上址長期有大量發泡膠箱堆放行人路,更「疊到成座山咁高」,不滿視線受阻之餘,亦擔心會造成意外,「啲箱疊到仲高過個人,仲有啲卡板同手推車擺喺隔籬,冧落嚟整傷人邊個負責?」

食署懶執法 街坊不滿

食物環境衞生署發言人表示,接獲本報轉介後派員巡察,發現上址有物品堆積,有關物主經該署人員警告後已移走物品,潔淨服務承辦商及後亦已清理及清洗。發言人補充,該署去年共接獲一宗相關投訴,惟全年均未有提出檢控。

「啲發泡膠箱日日都喺度,仲堆到成幅牆咁,有咩理由成年都冇檢控?」王先生直斥食環署有法不執,未有積極為市民改善社區環境,要求加強巡察及檢控,以收阻嚇作用。

第一手消息請下載on.cc東方互動iPhone/iPad/Android/Windows Phone Apps