中環出更:康熙御製彩瓷料8000萬成交

由香港蘇富比舉辦嘅重要中國瓷器及工藝品春季拍賣會,喺下月三至七日舉行預展,四場拍賣會將會拍賣超過三百件合共逾六億元嘅珍品。今次拍賣嘅焦點落喺前全國政協常委、有「政壇富婆」之稱嘅著名收藏家張永珍身上,因佢雅藏嘅一隻清朝康熙御製胭脂紅地琺瑯彩蓮花圖盌將會隆重登場。據知呢件彌足珍貴嘅清代古董,三十年來已經歷三次拍賣,料今次拍賣成交價將創新高,逾八千萬港元。

祖籍江蘇嘅張永珍出咗名鍾情清代瓷器,她已多次高價買心頭好,好似今次割愛,就比較少見。佢○二年出手四千萬元買咗個清雍正粉彩蝠桃《福壽》紋橄欖瓶,後來捐咗畀上海博物館,震驚中外;一○年十月,佢再以天價二億五千多萬元購下清乾隆「萬壽連延」圖長頸葫蘆瓶,成交價高出估價五倍之多,打破咗中國工藝品及瓷品嘅世界拍賣紀錄。

富婆「珍藏」:鍾意就買

張永珍對買古董顯得好隨意,佢講過:「只要鍾意嘅就要買,冇考慮過價錢問題。」佢又話過,愛女都係從事瓷器工作,所以屋企嘅珍藏多到唔記得,除咗會喺拍賣會競投,竟然喺機場都有機會執到寶。

至於今次拍賣會拍賣嘅呢件清朝彩瓷,香港蘇富比中國瓷器及工藝品部資深專家沈恩文解釋,琺瑯彩藝本由西方國家傳入,當年因康熙皇帝熱衷西方藝術,所以引入呢種彩藝運用於瓷器之上。佢話,呢件彩瓷係由江西景德鎮瓷窯精製,上面嘅荷塘蓮花圖案有別於一般中國畫功,屬於寫實方式。

卓妮

第一手消息請下載on.cc東方互動iPhone/iPad/Android/Windows Phone Apps