政情:謝偉俊活化「古董」

潮流興保育同活化,殊不知呢個風氣都疑似蔓延至政圈。據聞外號「西環契仔」嘅謝偉俊(阿Paul)最近靜靜起革命,有意喺今年年中前搞吓講座同活動等熱身,之後會喺年中搞個智庫形式嘅平台,明眼人都睇得出係箍實啲地區樁腳,不過最耐人尋味嘅係,聽聞阿Paul初步接觸嘅人當中,其中一人係革新會成員黃博度,莫非阿Paul有意好似生意人咁借殼上市,準備發功活化革新會?

我哋日前率先報道,新一輪政黨政團整合亦暗地裏展開,其中衞生服務界議員李國麟好大機會嫁入公專聯,建制派陣營亦開始有異動,消息指一直保持獨立身份嘅阿Paul,最近有感香港回歸近十六年,開始要探討《基本法》講明香港五十年不變嘅含意,因此最近都成日搵人傾偈,其中一個行得較埋嘅就係有革新會身份嘅黃博度。

如果大家年紀較為年輕嘅話或者未必會識革新會有乜來頭,不過翻查網上資料顯示,革新會係已故御用大律師貝納祺喺一九四九年創立,起初唔少革新會成員都係市政局及早期區議會選舉嘅主要成員,另外較為熟悉嘅成員係樹仁大學創辦人胡鴻烈。

積極構建地區網絡

事實上,革新會近年都絕迹於立法會同區議會選舉,今次阿Paul同黃博度行得咁埋,莫非隱含住活化革新會嘅先兆?阿Paul接受查詢時笑言倘活化到都無所謂,又承認黃博度係新平台嘅「台柱」之一,至於具體進展就以籌劃中為由無再透露詳情。

阿Paul除咗靜靜籌建新平台外,亦不敢怠慢構建地區網絡,聽聞阿Paul都深明地區服務最緊要有據點,所以都四出搵地方開辦事處,最近終於有喜訊傳出,原來阿Paul擊敗咗公民黨梁家傑同民主黨胡志偉,抽到兵家必爭嘅牛頭角下邨開辦事處,聽聞之後阿Paul仲想再下一城,進駐較多中產嘅藍田開多個辦事處,疑似矛頭直指票源相近嘅公民黨,睇怕梁家傑都要打醒十二分精神準備迎戰喇!

第一手消息請下載on.cc東方互動iPhone/iPad/Android/Windows Phone Apps