政情:跌斷手未知驚 陳維安玩帆船

立法會秘書長陳維安(Kenneth)去年聖誕節同家人去新西蘭度假,喺皇后鎮玩靠人體重心驅動嘅兩輪車Segway時不慎跌斷左手腕骨,返港求醫後足足打咗六個星期石膏,至今仍未活動自如。不過,佢都仲係未知驚繼續玩刺激活動,尋日喺立法會同傳媒聚會時自爆近期同囝囝一齊玩靠風力航行嘅帆船。

Kenneth話,佢一直好想學揸船,於是走咗去考船牌,但「肥佬」咗。佢話成個考試分為兩個部分,雖然船長試僥倖合格,但大偈試就「肥佬」收場,要四月份再補考。Kenneth話,佢學揸船嘅目標並唔係想遠洋航行,只係想喺香港水域兜番幾個圈,或者由港島揸船去九龍喎。

老婆大膽玩滑翔翼

埃及樂蜀熱氣球意外引起全城關注,鍾意玩唔同運動嘅Kenneth就話,佢一向好少玩呢啲極限運動。佢透露,之前去外地旅行時,有一個地方專畀旅客玩笨豬跳、滑翔翼等極限運動,雖然佢同兩個囝囝都驚有危險唔敢玩,但佢老婆竟然提出想玩滑翔翼,仲叫Kenneth喺地面幫手拍片。Kenneth事後諗番,都驚嘆老婆仲大膽過自己喎。

第一手消息請下載on.cc東方互動iPhone/iPad/Android/Windows Phone Apps