政情:廢腑之言:會長應受薪多多都唔夠

香港律師會會長葉禮德(Dieter)前排發信諮詢會員對會長支薪嘅意見,Dieter尋日同傳媒茶敍時就好緊張澄清,其實只係想會員喺五月會員大會畀吓意見,建議即使通過亦不適用於本屆會長。不過Dieter就呻話,會長原來好多嘢做,佢過去七、八個月擺咗超過一半時間落律師會職務,自覺對生意拍檔同屋企人都唔多公平,所以即使會長受薪都好合理。至於幾多人工先足以補償?Dieter就話「多多錢都唔夠」,因為陪屋企人嘅時間係無價嘅。不過佢又心痕痕好坦白咁話,其實只做一年會長時間太短,難有作為。至於會否尋求連任?Dieter就即刻推老婆出嚟擋,要睇吓老婆會唔會詐型先喎!

(梁卓怡攝)

第一手消息請下載on.cc東方互動iPhone/iPad/Android/Windows Phone Apps