網上團購無王管 消費陷阱不勝防

香港話就話係購物天堂、正貨之都,其實得個虛名嘅咋,今時今日消費陷阱多多,劏客手法層出不窮,尤其係網上購物,直情好似無王管,稍一不慎隨時中招㗎。

話說早前有團購網站聲稱以優惠價推售日本原裝入口嘅化妝水,有位消費者不虞有詐,一次過買咗六支,點知取貨後先至發現貨不對辦,無論瓶身設計或者印刷,都同原裝貨有好大分別。後來經本報轉介,相關代理商證實呢批化妝水屬仿冒產品,團購網站即時停售及退款。

呢位消費者不慎買入假貨,識得向本報求救,終於獲得退款,總算係不幸中之大幸,但唔係個個都咁好彩㗎,好似呢啲貨不對辦嘅消費陷阱無處不在,唔知幾多人中招而投訴無門,邊個為佢哋主持公道呢?邊個為佢哋追討損失呢?

嗱嗱嗱,隨着網上購物愈來愈普遍,問題亦愈來愈多,消委會去年共接獲二千六百幾宗與團購有關嘅投訴,較前年急增近四倍,你都咪話問題唔嚴重。消委會煞有介事忠告消費者,團購前應先評估網站嘅可靠性,一旦懷疑購得假貨,要即時投訴咁話。

唉,鬼唔知阿媽係女人咩,個個都係話自己誠實嘅喇,團購網站究竟可唔可靠,一般消費者又點識得評估吖?講到底,網上購物問題多多,投訴急增,主要係因為法例落後,監管不足,當局唔盡快修例堵塞漏洞,反而叫消費者自己評估網站可靠性,簡直九唔搭八。正如有立法會議員話齋,近年通脹加劇,百物騰貴,以價廉物美為招徠嘅團購網站應運而生,成行成市,但政府到依家都未有任何法例監管,真係好失望!

講到失望,又點只咁吖。消費陷阱無處不在,除咗團購涉及貨不對辦,仲有黑店以次充好、健美中心劏客等等,不良營商手法層出不窮,日新月異,令人防不勝防,搞到購物天堂個朵臭晒。呢,早前有位女士收到健身中心職員來電,話舊會員可獲贈一年免費使用健身設施會籍,點知原來係引君入甕嘅圈套,佢一現身即受到職員輪番上陣疲勞轟炸,結果被迫簽約購買咗五年價值超過七萬元嘅會籍及教練課程。最慘係,呢位女士月入僅九千元,大拿拿七萬元卡數點還呀?

冇錯,交友要帶眼識人,購物要帶眼識貨,健美又好,團購又好,消費者自己固然要提高警覺,以防受騙,最緊要記住便宜莫貪,但要剷除消費陷阱,杜絕不良營商手法,歸根究柢都係要修訂法例,加強監管,即係話,政府責無旁貸。嗱,你哋都唔想購物天堂變成劏客地獄o架!