港府政治任命官員周不時都被人用「放大鏡」檢視各項行為操守，所以事前嘅品格審查極為重要。據聞港府對無論係新加入或從事公職多時嘅政治委任官員，除咗大家都知嘅「查三代」做法外，原來連曾經有幾多個女朋友，係咪鍾意打麻將同去澳門賭場等等，都巨細無遺地觸及到，要做政治委任官員認真唔簡單。
近年多名主要官員嘅行為操守都受到質疑，令外間關注品格審查機制係咪繼續行之有效。有知情人士透露，其實品格審查工作極為嚴格，除咗基本有無「嫖賭飲吹」傾向，有否犯過任何罪行等，原來連係咪鍾意打麻將同去澳門賭場等，都會係審查內容之一。
至於當事人私生活方面，聽聞當事人曾經有幾多個女朋友亦係需要披露嘅內容，加上有關方面都會循當事人嘅父母、朋友等收料，所以話審查嘅內容係為當事人做「全身檢查」都不足為過。
至於港府高層屢次陷入嘅僭建風波，會否成為日後品格審查嘅內容呢？有政界人士預料，當事人住宅有無僭建問題即使唔納入審查內容，站在政治敏感度立場而言亦無可能存在，睇怕呢個審查清單只會係愈來愈長。