中環出更：楊孫西打呔林樹哲即幫手

近排喺中港政壇斬獲豐盛嘅福建幫，氣勢好旺，尋日下午福建社團聯會喺北角總部舉行新春團拜，過百名福建幫到場齊賀新禧，政界人士亦踴躍畀面出席。全國政協會議即將喺下月初召開，確定將卸任全國政協常委嘅福建幫僑領楊孫西一到場，就按規矩喺接待處換上會呔，聯會主席林樹哲見到，即刻上前親自幫佢執正條呔。咁啱盛傳林樹哲將接替楊孫西升任政協常委，兩人此刻互動咁合拍，箇中巧妙盡在不言中。
林樹哲（左）親自幫楊孫西（右）執正領呔，兩人有講有笑。
林樹哲（左）親自幫楊孫西（右）執正領呔，兩人有講有笑。

董吳玲玲過足湊孫癮

首次躋身全國人大嘅前中華廠商聯合會會長黃友嘉及新界社團聯會嘅陳勇，都現身同鄉里拜年，仲有民政事務局副局長許曉暉、科技大學副校長黃玉山等自己人。聯會副主席董吳玲玲都精神奕奕到場，過年佢同老公及三歲孫女Molly去台灣玩足四日，董太笑稱此行過足湊孫癮，好彩孫女又乖又識氹人歡喜，講起旅程趣事一籮籮，窩心到極。

董吳玲玲（右）及黃友嘉（左）齊去沾喜氣。（溫國佳攝）
  • 董吳玲玲（右）及黃友嘉（左）齊去沾喜氣。（溫國佳攝）