政情：蔣麗芸獅吼功授徒
人有唔同性格，做議員亦有唔同風格，民建聯兩師姊妹蔣麗芸（Ann）同李慧琼（Starry）尋日齊齊坐花車向巿民拜年。前者喺立法會以一句「你使唔使炒佢呀」？以獅吼功迅速上位，後者循超級議席連任立法會議員，仲做埋行政會議成員，喺最近一次港大民調，排名十七。佢個人規規矩矩，人氣就升得慢咗啲。
新年新氣象，文靜嘅Starry點至可以加啲辣，喺立法會同Ann姐一唱一和？Ann姐嘅立法會議員經驗比Starry少四年，年紀比Starry大咗一截，佢二話不說豪不吝嗇過兩招畀Starry，佢建議對方競步同唱卡拉ＯＫ，話兩個方法都可以練氣，特別係競步可以增強心肺功能，講嘢都可以大聲啲喎。Starry嘅回應仍然係好斯文，佢話周不時都同Ann姐觀摩互相學習，如果可做到剛柔並重就好嘞。
講嘢大唔大聲當然唔係夠唔夠氣嘅問題，夠氣講嘢都未必大聲。睇吓喺新嘅一年，Starry講嘢會唔會大聲啲，而Ann姐又會唔會收細聲量呢？做人風格或者難變，但火候都可以調校嘅，西九新動力嘅梁美芬本來就夠惹火啦，佢早前都居然話，睇番阿Ann，好似小學一年班咁。立法會有唔同風格嘅議員，咁至夠熱鬧。
苦練議事秘笈 同長毛鍊過
Ann姐自己都話有需要改進嘅地方，佢入議會唔夠半年，就已經同社民連梁國雄（長毛）好戲連場，Ann姐話入咗立法會咁耐都未讀熟《議事規則》，嚟緊希望可以抽多啲時間苦練議事秘笈，等佢可以繼續同長毛喺議會廳內過招喎。長毛等人都係因為鑽《議事規則》嘅空子，至可以玩到出神入化，Ann姐如果有心要鬥法，就真係要加油喇。
今年係蛇年，屬蛇、豬、虎同猴嘅人都會犯太歲。七四年出世嘅Starry話自己屬虎，今年犯太歲，為咗避免全年都諸事不順，佢專登喺初一就去咗大埔林村拜神攝太歲，希望今年平平安安。