現屆立法會嘅單身男性議員已經買少見少，陳克勤算係其中一位「筍盤」，一早供完層樓，事業又算有成，但佢同任職金融界嘅女友都拍拖好幾年，到依家仲未拉埋天窗。尋日情人節，克勤仔出席沙田鄉事委員會團拜時，再次被人追問佢幾時結婚嘅尷尬問題。克勤仔就好怕醜話，結婚唔係一個人嘅事，雖然自己已經好有誠意，但要雙方都有共識至得喎。咁講法，莫非女友唔肯嫁畀佢？再問佢拍咗幾耐拖？克勤仔就話唔方便講太多喇，因為大家都知佢拍拖多年，一講出嚟好似向女友逼婚咁喎。
（張家灝攝）
