樂極生悲呢家嘢，相信大家都聽唔少啦。最近最慘烈嘅一宗樂極生悲個案，睇怕都非舊年嘅「十一海難」莫屬咯，當時人人興高采烈觀賞國慶煙花，點知失驚無神發生撞船慘劇，沉船大災難粉碎咗唔少美滿家庭，事發四個月仍然令人心有慼慼然，直接受害嘅家屬更加係難以釋懷。
既然樂極有可能生悲，咁係咪應該小心小心再小心呢？理論上當然係啦，只可惜人類係一種善忘嘅動物，往往好了傷疤忘了痛。聽講喎，年初二放煙花嘅時候，船上觀眾唔係人人都做足安全措施o架。
好嘞，功夫茶今日有一件事提提大家，日後去中港澳酒吧夜場尋歡作樂嘅時候，記住特別留意一種嘢，一種隨時亦係樂極生悲嘅嘢。到底係乜乜東東呢？大家要謹慎對待嘅係「煙花香檳」，簡單咁講即係一支香檳加一支煙花，開香檳慶祝順便點煙花助興。
人人都明白煙花係會噴出火燄嘅，萬一火燄碰到易燃物品點算好呢？容乜易釀成一發不可收拾嘅火災o架？呢嗱嗱嗱，呢個就係功夫茶呼籲大家小心謹慎嘅原因，玩火點都係危險動作。好衰唔衰，中港澳酒吧夜場非常流行煙花香檳，一經顧客落柯打即刻火熱動感啦啦啦，火熱送上。
大家記唔記得上個月南美洲國家巴西發生過一宗慘烈火災呀？當地一間夜總會冷不提防燒成人間煉獄，原因係樂隊表演嘅時候亂咁燃放煙花，一個唔覺意燒到火光熊熊，結果導致二百多死百多傷，絕對係慘不忍睹。
既然室內放煙花嘅後果可大可小，好心酒吧夜場就唔好胡亂玩火啦。須知道，香港法例早就將煙花列作違禁品，未經許可燃點或存放煙花係犯法o架，監都有得坐呀。
記者現場直擊過好多酒吧夜場，發覺運送煙花香檳嘅過程十分驚險，若然碰到易燃物品例如梳化之類真係不堪設想。仲有喎，酒吧夜場冇嘢多，最多就係酒精，而酒精着火大家都知道幾大鑊o架啦。
記者另外又發現，唔少酒吧夜場位處嘅商業大廈防火意識好差，走火通道到處擺滿雜物，逃生之路變得險阻滿途。至於防煙門咯喎，往往係中門大開，完全失去防煙嘅作用。你知啦，火災遇難者最大嘅敵人未必係火舌而係濃煙，唔焗到你死都焗到你暈，任得濃煙四散害人不淺o架！
其實計功夫茶話齋，既然亂放煙花係犯法行為，唔該官老爺就積極執法啦，唔好等到巴西事件喺香港出現翻版先至後知後覺。總而言之，樂極慎防生悲，執法最忌疏懶！