政情：鄧耀邦逢過年做「宅男」
農曆新年慣常會四出去拜年，但好多大家族就等親朋戚友上門拜年，好似「舖王」鄧成波（波叔）咁，家族人脈鼎盛，其四公子鄧耀邦（Jason）就透露，家族每年農曆新年都好大陣仗，由年初一開始，鄧家上下就要留守在家招待前來拜年嘅親朋戚友，足足半個月先完結。
在家招呼客人
問Jason留喺屋企拜年咁耐，會唔會影響工作？佢就話依家互聯網發達，有好多工作都可以安坐家中辦妥，可以一邊招呼客人，一邊打理生意。
祖籍南海九江嘅Jason又話，每逢農曆新年，家中必備家鄉特色煎堆款客。呢種煎堆係九江特產，並唔係坊間圓身嗰種，而係扁身嘅，但材料就與一般煎堆無異，都係以炸嘅糯米芝麻脆皮，包住香口花生碎粒。Jason話，以前嫲嫲在生的時候會親手煮煎堆畀親友食，依家就惟有買現成嘅煎堆奉客喇。