農曆新年快將來臨，立法會前日就布置地下大堂，有十多個工作人員好大陣仗咁擺放一棵大桃花。因為今年天氣反常，棵桃花運送到立法會時已開咁啲花，但據聞只係開咗第一轉花，應該仲有兩轉花開嘅。桃花除咗有助單身議員行桃花運外，仲可以旺人緣，對於平日一眾劍拔弩張嘅立法會議員來說，絕對係好事，所以幾萬元一棵桃花絕對係物有所值嘅。
