政情：鄧家彪順勢裝老成
今屆立法會內「四眼」嘅議員都為數唔少，工聯會勞工界議員鄧家彪（Bill）可算係深近視嘅表表者，事關原來佢雙眼都分別有千幾度近視，但由於角膜太薄做唔到激光矯視。恰巧佢當年要入東涌展開地區工作，想以較為「老成」形象示人，唔知呢啲係咪叫做錯有錯着呢？
角膜太薄 做唔到激光
阿Bill話，細個六、七歲睇醫生時，突然發現左眼已有六、七百度近視，右眼反而冇乜近視，當時都冇乜人解釋到點解，之後升讀中學時，連佢隻右眼嘅近視都直線急升，最後兩隻眼都有千幾度近視。不過，貪靚始終係人嘅天性，阿Bill自爆喺廿多歲時都考慮過係咪做激光矯視，但醫生話佢角膜太薄做唔到激光矯視，於是佢戴過一排隱形眼鏡。
不過，適逢○六年時，佢開始入東涌做地區工作，覺得服務街坊戴副眼鏡會「老成啲」，加上當時要日以繼夜開展工作，自此就戴眼鏡至今。當問及第日會否再考慮新科技減少啲近視，阿Bill笑言，如果將來真係要考慮改變形象，先再考慮有乜新科技可以一次過做喎。