中環出更：青聯「同學仔」 聽高官講課
香港青年聯會做青年工作做得有聲有色，近年積極拓展新領域增加影響力，少不免要開始觸及社會事務範疇，並要同港府高官打交道，因此青聯最近就搞搞新意思，聯同香港大學合作開辦公共行政培訓課程，更邀得七名高官講課，卓妮都有去咗睇吓啲官教書掂唔掂。
高永文許曉暉曾出席
據聞邀請得出席嘅港府高官個個都各有專長，之前已經登場講課嘅有最近忙於解決「奶粉荒」嘅食物及衞生局局長高永文，最近亦有一直關注社會企業發展嘅民政事務局副局長許曉暉等。呢個課程日前到咗最後一堂，壓軸出場嘅係政務官出身嘅教育局副局長楊潤雄。
就現場所見，青聯一眾兄弟姊妹正襟危坐咁聽課，有人笑言好似返番去讀書時代，青聯主席葉振都喺講課結束前總結話，佢哋舉辦呢類課程原因有二，一來係令大家了解政府施政理念同方針，二來可以同港府官員加深認識，有助青聯對社會各議題都可給予意見，青聯呢班大細路完成整個課程後更加意猶未盡，成班人齊齊整整去飲咖啡慶祝添！