添馬艦政府總部雖然叫做「門常開」，不過實際上牆高狗大重門深鎖，閒雜人等固然不得其門而入，如果你係傳媒工作者或者遊行示威者，好多時更加受到殺氣騰騰嘅保安人員不禮貌對待。簡單咁講，「門常開」不常開，除非你係受到特殊優待嘅達官貴人。
諷刺嘅係，辦事作風號稱密密實實嘅廉政公署，理論上應該「門常關」，關到密不透風烏蠅都飛唔入嗰隻，可惜實際上又係另一回事。位於北角嘅廉署總部大樓，被揭發淪為小妹妹自由行嘅「親子遊樂場」，十足十無掩雞籠。
呢個世界，無圖無真相，有圖見真章，廉署失驚無神變成另一個「門常開」，有冇真憑實據呀？當然有啦，本報得到一批二十幾張嘅照片，顯示一名幾歲大嘅細路女暢遊廉署執行處嘅機密樓層。從照片之中可以見到，小妹妹唔止暢通無阻，甚至由於趣致可愛而引來幾名調查員合照留念。聽講喎，呢一批照片已經上載至社交網站公開分享。
好嘞，功夫茶問問大家，堂堂執法部門居然任由一個小女孩穿梭往來，而且拍照，甚至公開，構唔構成洩密風險呢？如果你係投訴者或受害人，會唔會覺得「廉署保密、密密實實」嘅宣傳口號有必要改一改呢？廉署發言人就話嘞，大部分照片的確係幾年前喺廉署大樓之內拍攝，署方正在深入了解，若然證實有人違規將會紀律處分。
唉，功夫茶忽然之間有一種恨鐵不成鋼嘅悲涼感覺。你知啦，廉署一向形象討好，畀人嘅印象係既公正又嚴明，簡直就係港產包青天咁款，之但係廉記嘅表現愈來愈令人懷疑質素下降。首先係澳門巨貪歐文龍案，明明成件事同香港有千絲萬縷嘅莫大關係，哈，港產包青天唔去秉公處理，居然彈畀澳門廉署喎。其次，就係人所共知嘅香港第一貪官曾蔭權，貪腐醜聞經過東方報業集團連環踢爆已經一年嘞，拖咗咁耐竟然未有具體嘅執法行動，都唔知係咪官官相衞企圖不了了之。家陣再爆出一單「密實廉署門常開」事件，少不免令人浮想起四粒字：不知所謂！
再講吖，小妹妹廉署自由行嘅始作俑者好大機會係署方員工，話唔定係執法人員帶埋寶貝女返工，再順便拍幾張相向親朋戚友炫耀，呢家嘢已經涉嫌以權謀私啦，吓話？
總之一句到尾，唔該廉署莊敬自強，絕對唔可以自毀形象。港產包青天一方面要貫徹始終做好保密工作，另方面要實牙實齒痛打大老虎，若然醜聞纏身嘅貪官到頭來逍遙法外，廉政專員白韞六可能好唔得閒o架！