中環出更：雷添良冧莊人大請食海膽
全國港區人大代表雷添良（Tim）早前成功冧莊，為多謝助選團，早前喺上環一間會所擺咗幾圍，再搵專人加料買來新鮮海膽，食到大家舔舔脷。人緣甚佳嘅阿Tim，慶功宴上高朋滿座，除咗食物及衞生局局長高永文，一眾有份助選嘅好友，包括港大校務委員會主席梁智鴻、醫學會會長謝鴻興、醫專會主席江明熙、骨科名醫潘德鄰、菁英會前會長洪為民等紛紛到場湊熱鬧。
得票比想像多
擔任阿Tim競選經理嘅醫專會副主席鄭淇德，繼續幫手招呼賓客，而阿Tim就預備咗好多支紅酒、茅台及花雕款客，又叮囑好友放心擦餐勁，事關晚宴上群醫雲集，食完有乜唔舒服，包保有醫生睇喎，認真風趣。阿Tim風騷有原因嘅，事關今次得票比想像中多，佢笑言競選前曾被人睇淡選情，於是發動助選團拉票。忙完選舉後，佢未敢放鬆，三月將上京開會，再飛杜拜傾生意，所以農曆新年，都係留港抖抖養足精神備戰。