唉，香港真係愈來愈烏煙瘴氣，一個前任特首涉嫌貪腐被調查，一個現任特首涉嫌賄選被舉報，仲未計一個二個達官貴人輪番違規僭建。廉潔奉公喎，核心價值喎，遲早拆招牌都得啦！
現任特首梁振英近日一頭煙之外再惹上一身蟻，忽然受到自己一手扶植嘅死忠派支持者倒戈一擊，全國政協委員劉夢熊反轉豬肚發爛渣，誓神劈願指摘CY過橋抽板。簡單咁講，某人懷疑曾經應承過某君，他朝登基踐祚就會「畀個官你做」，作為頭號梁粉嘅投資回報，結果空口講白話承諾冇兌現，某君就以深閨怨婦嘅激昂口脗數臭對方始亂終棄，幾乎要學似粵語殘片慘遭花心大少佔盡便宜嘅小丫環咁樣講一句：「你點樣安置我吖！」
你知啦，畀個官你做關乎公眾利益，兩條政壇麻甩以重要官位私相授受，好難唔令人聯想到賣官鬻爵。於是乎，反對派好事之徒馬上向廉政專員公署投訴，罪名係賄選舞弊。
假如夢熊大師唔係山草藥噏得就噏，又經得起測謊機洗禮證實所言非虛，毋須願賭服輸由國金天台跳樓一死以謝天下，廉署真係好頭痕o架。喂，廉署嘅上司係特首，下屬查上司會唔會諸多忌諱或者嚴重偏私o架？廉政專員白韞六被議員問到呢一個問題嘅時候，佢話喎，廉署調查一視同仁，如果投訴涉及特首，唔會向特首報告，而係直接向律政司報告，若然律政司認為合適，將會轉介立法會跟進。白韞六又強調，廉署不偏不倚、公平公正、無畏無懼，上任七個月以來未感到有人施壓，如果有人要求廉署終止調查案件，會尋求律政司法律意見。
嗯……不偏不倚？公平公正？無畏無懼？功夫茶以前係十分認同嘅，奈何家陣已經變得唔再太肯定。原因非常之咁簡單，前任特首曾蔭權爵士涉嫌貪腐被調查，事發至今已經差不多一年嘞，除咗「繼續調查」之外似乎乜鬼嘢進展都冇，少不免令人產生一個並非杞人憂天嘅莫大疑慮，廉署係唔係想拖下拖下拖到不了了之呀？
即係咁，假如廉署真係不偏不倚、公平公正、無畏無懼，一早將貪遍海陸空嘅煲呔曾繩之於法，功夫茶以及全港七百萬市民都唔會質疑廉署調查甚至檢控梁振英嘅決心。問題係，貪曾事隔咁耐依然逍遙法外，咁又點叫人有信心CY會受到公正處理呢？
好心白韞六唔好再死拖爛拖，捉貪曾唔應該再姍姍來遲，以免今次查特首又備受質疑。情況其實一字咁淺，腐敗醜聞罄竹難書嘅貪曾一旦落網，全人類先至會相信廉署確係一視同仁！