政情：今日你上鏡：做官場老得快

有人以熱廚房嚟比喻官場，說明官場嘅壓力好大，唔係每個人都能夠適應，頭髮漸趨灰白嘅發展局局長陳茂波可能就係一例。上星期一嘅午飯時間，陳茂波同埋發展局常秘周達明由中環舊中國銀行大廈步出，急急腳登上官車離開。過程中陳茂波眉頭深鎖，看似滿懷心事，而佢以往嘅一頭烏黑短髮，亦變得灰白。睇嚟發展局局長嘅職務畀佢好大壓力，就連食晏都心事重重。自從陳茂波做咗問責官員之後，是非不絕，仲有好多棘手問題有待解決，令佢絞盡腦汁，只係半年光景，經已銀髮驟生。反觀佢身邊嘅常秘周達明，雖然年過半百，但莫講話白頭髮，就連一條皺紋都無，加入政府近三十年依然保持一貫嘅童顏，或者陳茂波要向佢請教保養之道。