乜嘢節日同場合都可以係政黨抽水嘅好機會，新春拜年當然唔例外。自由黨過往拜年後高調出稿，有立法會同僚睇唔過眼，決定搞綑綁式拜年，有水一齊抽，大家機會均等，邊個都唔可以抽多啲。
講緊嘅係去中聯辦拜年。自由黨過去曾率領幾十人浩浩蕩蕩去拜年，之後仲會發出新聞稿話佢哋見咗邊個主任、大家講咗啲乜，由於其他政黨唔會好似自由黨咁張揚，搞到自由黨可以獨家去拜年咁。今年就唔同嘞，建制派已經定咗喺元宵佳節嘅後一日，即係下月廿五日去食飯兼拜年，過往有份出席建制派飯局嘅議員一次過綑綁式一齊去，邊個都唔可以特別搶鏡。由於呢個安排，過往自由黨唔係立法會議員嘅年輕才俊，今年就會被拒諸門外，唔可以掹衫尾一齊去。
京城今年宣揚一切從簡，議員嘅拜年活動嚟緊都一次過搞掂，費事煩。