新系統會自動將原議案同各個修正案合併，仲可以刪去被否決嘅議案，議員喺議事廳內嘅電腦一撳左手邊個掣，就可睇到成個議案改成點，唔使再將原議案同修正案逐粒字對。
例如立法會討論民建聯葛珮帆（EQ）提出「幫助中產」嘅無約束力議案，工聯會郭偉強等九位議員就好似掛聖誕樹咁向原議案不斷提出修正案，去到最後，可能EQ自己都唔認得自己原本嘅議案，電子化後，最少有迹可尋。民主黨涂謹申就大讚新系統非常方便，話可以慳番研究修正案嘅時間之餘，又可以確保唔會投錯票，可謂一舉兩得。
其實電子化都係大趨勢，令到整個程序聰明啲、慳紙啲，但係議員議事嘅質素最重要，唔知電子化能否提高議員嘅議事質素呢？